សម្តេចបវរធិបតី ហ៊ុន ម៉ាណែត បានថ្លែងអំណរគុណចំពោះប្រធានាធិបតីសហរដ្ឋអាមេរិក លោក ដូណាល់ ត្រាំ និងនាយករដ្ឋមន្រ្តីម៉ាឡេស៊ី ដែលបានជួយសម្របសម្រួលអោយកិច្ចព្រមព្រៀងសន្តិភាពរវាងកម្ពុជា និងថៃ អាចសម្រេចបានជោគជ័យ។

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត ថ្លែងអំណរគុណចំពោះប្រធានាធិបតីអាមេរិក និងនាយករដ្ឋមន្រ្តីម៉ាឡេស៊ី ដែលបានជួយសម្របសម្រួលឱ្យកិច្ចព្រមព្រៀងសន្តិភាពកម្ពុជា–ថៃ សម្រេចបានជោគជ័យ

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានថ្លែងអំណរគុណយ៉ាងជ្រាលជ្រៅបំផុតចំពោះ លោកប្រធានាធិបតីសហរដ្ឋអាមេរិក ដូណាល់ ត្រាំ និង លោក អានវ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី និងប្រធានអាស៊ាន ដែលបានជួយសម្របសម្រួលឱ្យកិច្ចព្រមព្រៀងសន្តិភាពកម្ពុជា–ថៃ អាចសម្រេចបានជោគជ័យនៅពេលនេះ។

កិច្ចព្រមព្រៀងសន្តិភាពនេះ ត្រូវបានចុះហត្ថលេខានៅទីក្រុងកូឡាឡាំពួ នៅព្រឹកថ្ងៃទី២៦ ខែតុលា ឆ្នាំ២០២៥ ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា និង លោក អនុទីន ឆានវីរកុល (Anutin Charnvirakul) នាយករដ្ឋមន្រ្តីថៃ ដោយមានការចូលរួមជាសាក្សីពីលោក ដូណាល់ ត្រាំ ប្រធានាធិបតីសហរដ្ឋអាមេរិក និង លោក អានវ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី។

សម្តេចមហាបវរធិបតី បានលើកឡើងថា កិច្ចព្រមព្រៀងនេះជាព្រឹត្តិការណ៍ប្រវត្តិសាស្ត្រដ៏មានសារៈសំខាន់ ដែលបញ្ជាក់ឡើងវិញនូវការជឿជាក់រួមគ្នារបស់ប្រទេសទាំងពីរ ក្នុងការទប់ស្កាត់ជម្លោះ និងស្វែងរកសន្តិភាពយ៉ាងអចិន្ត្រៃយ៍។ សម្តេចថ្លែងថា “សន្តិភាពនៅតែអាចមាន ដរាបណាប្រជាជាតិទាំងអស់មានសេចក្តីក្លាហាន និងសុភវិនិច្ឆ័យក្នុងការស្វែងរកដំណោះស្រាយដោយសន្តិវិធី”។

តាងនាមប្រជាជនកម្ពុជា សម្តេចមហាបវរធិបតី ហ៊ុន ម៉ាណែត បានថ្លែងអំណរគុណយ៉ាងជ្រាលជ្រៅចំពោះ លោកប្រធានាធិបតី Donald J. Trump ក្នុងភាពជាអ្នកជំរុញ និងគាំទ្រសន្តិភាពយ៉ាងខ្ជាប់ខ្ជួនរវាងកម្ពុជា និងថៃ។ សម្តេចក៏បានថ្លែងសំណូមពរអំណរគុណចំពោះការខិតខំប្រឹងប្រែងយ៉ាងមិននឿយហត់របស់លោក ត្រាំ ក្នុងការជួយឲ្យសមិទ្ធផលសន្តិភាពនេះក្លាយជាការពិត។

ជាមួយនេះ សម្តេចមហាបវរធិបតី ក៏បានថ្លែងអំណរគុណដល់ លោក អានវ៉ា អ៊ីប្រាហ៊ីម នាយករដ្ឋមន្រ្តីម៉ាឡេស៊ី ចំពោះការសម្របសម្រួល និងការគាំទ្រដោយឥតលំបាកក្នុងដំណើរការស្វែងរកសន្តិភាពរវាងប្រទេសទាំងពីរ រហូតដល់បានជោគជ័យ។ សម្តេចក៏បានថ្លែងអំណរគុណដល់ថ្នាក់ដឹកនាំអាស៊ាន ប្រទេសចិន និងដៃគូនានា ដែលបានគាំទ្របទឈប់បាញ់តាំងពីដើមមក។

កម្ពុជាបានបញ្ជាក់ជាថ្មីនូវការប្តេជ្ញាចិត្តយ៉ាងមុតមាំក្នុងការអនុវត្តសេចក្តីថ្លែងការណ៍រួមនេះដោយភាពស្មោះត្រង់ និងបន្តសហប្រតិបត្តិការជិតស្និទ្ធជាមួយប្រទេសថៃ និងដៃគូនានា ដើម្បីធានាថា សន្តិភាពនេះនឹងនៅតែស្ថិតស្ថេរ និងនាំមកនូវផលប្រយោជន៍ជាក់ស្តែងដល់ប្រជាជនទាំងពីរ។

សម្តេចនាយករដ្ឋមន្រ្តីក៏បានអំពាវនាវឱ្យសហគមន៍អន្តរជាតិ និងដៃគូនានា បន្តការគាំទ្រ និងរួមចំណែក ដើម្បីធានាថា កិច្ចព្រមព្រៀងសន្តិភាពនេះនឹងអាចអនុវត្តបានជាប្រសិទ្ធភាព និងអាចឲ្យប្រជាជនទាំងពីរទទួលបានផលចំណេញពិតប្រាកដ។

ជាចុងក្រោយ ដោយទទួលស្គាល់កិច្ចខិតខំប្រឹងប្រែង និងការលះបង់ដ៏ធំធេងរបស់ លោកប្រធានាធិបតី Donald J. Trump ក្នុងការលើកកម្ពស់សន្តិភាព មិនត្រឹមតែរវាងកម្ពុជា និងថៃទេ ប៉ុន្តែថែមទាំងក្នុងសហគមន៍អន្តរជាតិ សម្តេចមហាបវរធិបតី ហ៊ុន ម៉ាណែត បានប្រកាសស្នើឱ្យដាក់បេក្ខភាព លោក ត្រាំ សម្រាប់ពានរង្វាន់ណូបែលសន្តិភាព៕