វីរៈកងទ័ពកម្ពុជា ១៨ រូប ត្រូវបានភាគីថៃដោះលែង និងប្រគល់មកកម្ពុជាវិញ ក្រោយជាប់ឃុំអស់ ១៥៥ ថ្ងៃ

ភ្នំពេញ៖ នៅព្រឹកថ្ងៃទី៣១ ខែធ្នូ ឆ្នាំ២០២៥ វីរៈកងទ័ពកម្ពុជាចំនួន ១៨ រូប ត្រូវបានភាគីថៃដោះលែង និងប្រគល់ឲ្យអាជ្ញាធរកម្ពុជាវិញតាមច្រកព្រំដែនក្នុងខេត្តប៉ៃលិន ដោយសុវត្ថិភាព បន្ទាប់ពីត្រូវបានចាប់ឃុំអស់រយៈពេល ១៥៥ ថ្ងៃ។

ការដោះលែងនេះ គឺជាលទ្ធផលនៃការចរចា និងកិច្ចសហការរវាងភាគីទាំងពីរ បន្ទាប់ពីបទឈប់បាញ់បានចូលជាធរមានកាលពីព្រឹកថ្ងៃទី២៩ ខែកក្កដា ឆ្នាំ២០២៥ កន្លងទៅ។ វីរៈកងទ័ពទាំងអស់ត្រូវបានទទួលស្វាគមន៍ដោយអាជ្ញាធរកម្ពុជា និងត្រូវបានរៀបចំឲ្យពិនិត្យសុខភាព មុននឹងបញ្ជូនត្រឡប់ទៅកាន់ក្រុមគ្រួសារ និងអង្គភាពរបស់ខ្លួនវិញ។

ព្រឹត្តិការណ៍នេះ ត្រូវបានមតិសាធារណជនមើលឃើញថា ជាជំហានវិជ្ជមានមួយ ក្នុងការកសាងទំនុកចិត្ត និងការរក្សាសន្តិភាពនៅតាមព្រំដែនកម្ពុជា–ថៃ ព្រមទាំងបង្ហាញពីការខិតខំរបស់ភាគីពាក់ព័ន្ធ ក្នុងការដោះស្រាយបញ្ហាតាមផ្លូវសន្តិភាព និងការទូត។

ការវិលត្រឡប់មកវិញរបស់វីរៈកងទ័ពទាំង ១៨ រូបនេះ បាននាំមកនូវសេចក្តីសុខចិត្ត និងការអបអរសាទរយ៉ាងខ្លាំងពីក្រុមគ្រួសារ មិត្តភក្តិ និងប្រជាពលរដ្ឋកម្ពុជា ដែលតែងតែតាមដាន និងសង្ឃឹមឲ្យមានការដោះលែងដោយសុវត្ថិភាពជាបន្តបន្ទាប់។