កម្ពុជាបដិសេធការចោទប្រកាន់របស់ថៃ៖ ប្រាសាទតាមាន់ត្រូវបានបាញ់ដោយយោធាថៃ មិនមែន BM-21 របស់កម្ពុជាទេ

(ភ្នំពេញ)៖ ក្រសួងការពារជាតិកម្ពុជា តាមរយៈលោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យប្រកាសនៅម៉ោង ១១ ព្រឹក ថ្ងៃទី ២៧ ខែកក្កដា ឆ្នាំ ២០២៥ថា ការចោទប្រកាន់ពីកងទ័ពថៃអំពីការបាញ់ BM-21 ចូលកាន់ប្រាសាទតាមាន់ គឺជាការចោទប្រកាន់ដែល គ្មានមូលដ្ឋានស្របហេតុផល និងមាន ចេតនាទុច្ចរិត។

លោកស្រីបានបញ្ជាក់ថា៖

“ប្រាសាទតាមាន់ជាកម្មសិទ្ធិរបស់កម្ពុជា ដែលស្ថិតនៅក្នុងដែនខេត្តឧត្តរមានជ័យ ដោយផ្អែកលើផែនទីស្របច្បាប់។ គ្មានហេតុផលណាមួយដែលកម្ពុជាចង់បំផ្លាញប្រាសាទរបស់ខ្លួនឡើយ។”

គ្រប់ព័ត៌មានដែលបង្ហោះនៅលើផេកផ្លូវការរបស់កងទ័ពជើងគោកថៃបានត្រូវបដិសេធយ៉ាងជាក់ច្បាស់។ ខណៈដែលកម្ពុជាព្យាយាមរកដំណោះស្រាយតាមសន្តិវិធី ខាងភាគីថៃវិញបានបង្ហាញនូវសកម្មភាពរំលោភដែលកើតឡើងក្នុងយប់ទី២៧ ខែកក្កដា។

សកម្មភាពវាយប្រហាររបស់កងទ័ពថៃ
ម៉ោង ០២:០០ ព្រឹក: បាញ់ផ្លោងចូលទីតាំងវាលឥន្ទ្រី

ម៉ោង ០២:៣០: ទម្លាក់គ្រាប់បែកលើតាថាវ, ភ្នំ ៣៣៣ និងភ្នំខ្មោច

ម៉ោង ០៤:៥០: បាញ់ប្រាសាទតាមាន់ធំ និងប្រាសាទតាក្របី

ម៉ោង ០៦:០០: ឈ្លានពានភ្នំខ្មោច, តំបន់អានសេះ និងវាលឥន្ទ្រី

ម៉ោង ០៦:៣០: បាញ់ទំលាក់ធំទូលាយជាមួយរថក្រោះ និងកងទ័ពថ្មើរជើង

កម្ពុជាបង្ហាញការប្រកាន់ខ្ជាប់លើអធិបតេយ្យភាពជាតិ
កម្ពុជាបានអំពាវនាវឲ្យភាគីថៃ

បញ្ឈប់ការឈ្លានពាន និងឈប់ប្រើលេសមិនពិត

គោរពតាមច្បាប់អន្តរជាតិ

ទទួលខុសត្រូវចំពោះសកម្មភាពគម្លាតច្បាប់និងរំលោភសិទ្ធិ

ពេលនេះកម្ពុជាបញ្ជាក់សារជាថ្មីលើការប្តេជ្ញាចិត្តក្នុងការរកដំណោះស្រាយដោយសន្តិវិធី និងការអនុវត្តសិទ្ធិស្វ័យការពារដូចដែលបានកំណត់ក្នុង មាត្រា ៥១ នៃធម្មនុញ្ញអង្គការសហប្រជាជាតិ ដើម្បីការពារបូរណភាពទឹកដី និងសុវត្ថិភាពប្រជាជនខ្លួន។